الزائرة!
- صديق لخبايا وبيحكي ويقول.
ظروف شغل بابا خلتنا ننتقل لشقة جديدة وفي بلد تانية..
الشقة كانت واسعة جداً وعاملة زي المغارة بتاعت علي بابا..
لما دخلنا الشقة أول يوم حسينا بحاجة مش طبيعية خالص فيها.
كانت الشقة حر جدا مع أنها في الدور التاني وفوقينا شقق كتير..
بعد ما نضفنا الشقة دخلنا ننام لأننا كنا تعبانين جدا، وبالليل صحيت على صوت حركة في أوضتي.. فتحت عيني لقيت واحدة ست عجوزة قدام السرير وبتبص ليا
كان شغلها مرعب لدرجة إني صرخت صرخة خلت كل اللي في البيت يصحى
حكيتلهم على اللي شوفته.. راحت والدتي ردت عليا وقالتلي تلاقيك علشان كنت تعبان..
تاني يوم أمي جتلنا وصحيتنا من النوم بالليل وقالتلنا إن هي كل ما تحط الشنطة على الطرابيزة اللي لزقة في السرير بتاعها تحس بحد يزق الشنطة عليها وتقع على أمي، وتقوم تحطها تقع تاني
وفجأة وهي بتحكيلنا سمعنا أصوات غريبة وأغلبيتها زعيق وصريخ وكلام غريب، لحد ما بدأنا نقرأ قرآن كلنا ونكتر من أية الكرسي وعرفنا ننام الحمد لله.
بعد كام يوم أختي تعبت جدا ودخلت تنام، حسيت بإيد ناعمة جدا بتمشي على ايدها شعرها أكتر من مرة.. أختي صحيت تبص حواليها لقت باب الأوضة مقفول عليها وكلنا قاعدين بره.
والدي كمان قال إنه بالليل حس بحد زي ما يكون بيطبطب على ضهره، ولما التفت شاف ست عجوزة واقفة جنب السرير وبتضحكله.. وفجأة الست دي فضلت تلف حوالين نفسها في دواير وتتطوح كأنها سكرانة أو دايخة.
كلمنا الراجل اللي أجرنا منه الشقة ميردش علينا
حاولنا نروحله البيت يتهرب مننا لحد خامس يوم، ماما صحيت من النوم مفزوعة وقالت انها شافت الست دي قاعدلها على الكرسي اللي قدام السرير وبتضحكلها. وفجأة وهي بتحكي النور قطع وكل حنفيات البيت اتفتحت لوحدها وبدأ يطلع منها مياه، والبوتجاز كل المفاتيح اتفتحت وبدأنا نشم ريحة غاز..
خرجنا من الشقة وفضلنا قاعدين على السلم
وتاني يوم الصبح لمينا حاجتنا..
بعد كدا وبالصدفة عرفت ان في واحدة ست عجوزة كانت عايشة في الشقة دي ومفيش حد من ولادها كان بيسأل عنها.. وإنها لما ماتت محدش اكتشف جثتها غير بعد أسبوع من موتها
التعليقات
للتعليق يجب عليك تسجيل الدخول اولا