الجسر الخشب!
صديق النادي الخبايا بيحكي ويقول: أنا طول عمري بحب اقرأ عن الجن وعندي كتب كتير عن الجن والتحضير والسحر .. بصراحة أنا عندي إحساس إن الجن بيخاف مننا زي ما احنا بنخاف منه، متضحكوش .. بس أنا فعلاً حاسس بكدا.
أنا عايش في قرية ريفية من قرى مصر .. حياة بسيطة وهادية جداً ...
شباك اوضتي بيطل على جسر خشب قديم، قليل جداً لما حد بيعدي من عليه ..
كنت ساعات برجع بالليل متأخر بحكم الدروس وكدا وبعدي من على الجسر ده ..
قريب من الجسر كان فيه زي عشة لواحد اسمه (عبده) .. الناس بتقول عليه انه مخاوي جن ..
وأنا بعدي على الكوخ بشوف ضوء أحمر شديد، كأن في نار جوا الكوخ، وأسمع صرخات عيال صغيرة جاية من بعيد، وأنا وقتها مبفكرش في أي حاجة إلا اني لو وقفت لحظة قدام الكوخ مش هوصل بيتي أبداً.
جربت اقول لوالدي بصلي باستغراب وقالي ايه يا ابني أنت كبرت على انك تخاف من الضلمة
مرة معدي من هناك لقيته قاعد جنب العشة بتاعته وعمال يجيب عيدان ناشفة ويربطها ببعض بخيط ..
افتكرت كلام بابا واني لازم مخفش، وبصراحة كنت عاوز اعرف ايه حكاية الراجل ده. رحت ناحيته قولتله السلام عليكم. بصلي ومردش السلام. وسألني: عاوز حاجة؟
اتكلمت معاه والكلام جاب بعضه وفهمته اني عاوز أعمل عمل لواحد صاحبي بكرهه في المدرسة
طبعاً أنا كنت بحاول اكذب عليه عشان نفسي أعرف هو مخاوي ولا لا
عبده طلب مني شوية طلبات وطلب مني أجيب (اتر) من صاحبي. منديل أو فانلة أو حاجة بيلبسها
تاني يوم خدت منديل بتاع واحد صاحبي من غير ما يعرف ورحت لعبده واديته له
قالي تعالي معايا
مشيت مع عبده ورحنا لآخر شارع في المقابر (المقابر عندنا متقسمة لطرق وشوارع بالمناسبة)
وصلنا عند قبر مفتوح وبعدين عبده جاب حاجة ميتة (تقريباً قطة) وربط فيها المنديل بتاع صاحبي بتلات عقدات، وقالي أنا هربطه ليك بتلات عقد عشان كل لما يفك عقدة تتبقى عقدة تانية. وضحك ضحكة خبيثة، وطلب مني ادخل جوه القبر وأحفر فيه حفرة وادفن الحاجة
جيت أرفض لقيت عينيه برقت وقالي ادخل وفعلاً دخلت ودفنت الحاجة وخرجت.
طول الليل بعد كدا فضلت افكر في اللي عملته. تاني يوم لقيت صاحبي اللي عملتله العمل مجاش .. ولمدة أسبوع فضل غايب وكل ما اتصل عليه ميردش
خدت نفسي ورحتله .. قابلت والده اللي قالي إن صاحبي عيان. حاولت استدرجه في الكلام، المهم فهمت أنه عليه مس من الجن وأنه دايماً يدخل الحمام ويفضل نايم فيه ومش عاوز يخرج منه وبيفضل يصرخ طول الليل ويتكلم بأصوات غريبة .. وانهم جابوله شيوخ عشان يفكوا اللي عليه لكن ميعرفوش.
مشيت وأنا مصدوم
أنا السبب في اللي حصل لصاحبي. رحت لعبده اللي عمله العمل وطلبت منه يفكه
فضل يضحك كتير ويبصلي وميتكلمش
عرضت عليه فلوس لكن رفض فهددته انه هقول لأهل صاحبي، تقريباً هو خاف فقالي طيب روح وهو هيتصرف
المهم بعد كام يوم عبده مات ..
معرفش سبب موته أو ايه اللي حصله بالضبط. بس من كتر ما الناس كانت بتكرهه وخايفة منه رفضت تدفنه لغاية لما الحكومة جت شالت جثته ودفنوه
وبالنسبة لصاحبي هو خف وبقي تمام
بعد كذا كنت كل لما اعدي من قدام بيت عبده كنت بشوف جواه ظل اسود طويل .. وساعات كنت بشوفه يمشي ورايا لحد البيت، واقعد اجري لحد ما يختفي
أنا حاسس انه بيطاردني وعاوز يأذيني
أنا دلوقتي بقيت ملتزم ويصلي وبقرأ قرآن كتير وحرقت كل كتب السحر والجن اللي كانت عندي.
التعليقات
للتعليق يجب عليك تسجيل الدخول اولا